काठमाडौं, बैशाख ५
जर्मन बुन्डेसलिगा फुटबलमा बायर्न म्युनिखले सहज जित निकालेको छ । आइतबार राति भएको खेलमा बायर्न म्युनिखले आर्मीनियालाई ३-० गोलले पराजित गरेको हो ।
बायर्न म्युनिखलाई जित दिलाउन सर्ज जिनाब्री र जमाल मुसियालाले एक-एक गोल गरे ।बायर्नले एक गोल आत्मघाती उपहार पाएको हो ।
खेलको दशौं मिनेटमा आर्मीनियाका ज्याकब ब्यारेटले आत्मघाती गोल गरे पछि बायर्नले अग्रता लिएको थियो ।
पहिलो हाफको इन्जुरी समयको सातौं मिनेटमा सर्ज जिनाब्रीले गोल गर्दै बायर्नलाई २-० ले अघि बढाए ।
त्यसपछि खेलको ८४औं मिनेटमा जमाल मुसियालाले गोल गर्दै बायर्नलाई ३-० को सहज जित दिलाए ।
जितसँगै बायर्नले ३० खेलबाट ७२ अंक जोडेको छ र शीर्ष स्थानमा नौ अंकको अग्रता बनाएको छ ।पराजित आर्मीनियाको ३० खेलबाट २६ अंक छ र १७ औं स्थानमा छ ।
