आधारभूमि संवाददाता
ललितपुर २७ चैत
ललितपुर महानगरको प्रमुखमा नेकपा एमालेका केन्द्रीय सदस्य हरिकृष्ण व्यञ्जनकार सर्वसम्मत उम्मेदवार चयन भएका छन् । शनिबार बसेको नेकपा एमालेको पार्टी महानगर कमिटी बैठकले आफूलाई सर्वसम्मत रुपमा मेयरको उम्मेदवार बनाउने निर्णय गरेको व्यञ्जनकारले जानकारी दिए ।
नेकपा एमालेबाट महानगरपालिकाको उपमेयरमा भने २ जनाले दावी परेको छ । पार्टी महानगर कमिटीको अध्यक्ष आस्था शाक्य ‘मञ्जली’ र पार्टी प्रदेश कमिटी सदस्य सरस्वती खड्काले उपमेयरको लागि दावी प्रस्तुत गरेका छन् । व्यन्जनकार एमालेको केन्द्रिय कमिटी सदस्य तथा ललितपुर जिल्ला सह इन्चार्ज समेत हुन् । गत २०७४ को स्थानीय तहको निर्वाचनमा काङ्ग्रेसका चिरिबाबु महर्जनसँग ३ अंकको झिनो मतान्तरले पराजित भएका व्यञ्जनकार यस पल्टको निर्वाचनमा जित्ने विश्वासका साथ मेयरमा उमेदवारी दिन लागेको वताए ।
महानगरभित्र बेथिति मौलाउदै गएकाले यस बर्ष कुनै पनि हालतमा आफूले जितेर ललितपुरलाई शिक्षा स्वास्थ्य खानेपानी पूर्वाधार विकास लगाएतका क्षेत्रमा उदाहरणीय काम गर्ने दावी गरे । आफूले ललितपुरको मुहार नै फेरिने गरी जनताको हितका कार्यक्रम ल्याउने वताउदै उनले पार्टीले टिकट दिएपछि आफ्ना थप एजेण्डा प्रश्ट पार्ने उल्लेख गरे ।
केही दिन अघि ४ हजारको संख्यामा युवाहरु एमालेमा प्रवेश गरेका थिए । जसको कारण उनी जितको नजिक रहेको आंकलन गर्दै त्यहााँका स्थानीयले अघिल्लो पटक नै जित्नुपर्ने क्षमता भएका व्यञ्जनकारलाई यसपटक जिताउन सके ललितपुरको विकासमा टेवा पुग्ने वताएका छन् ।
