आधारभूमि संवाददाता
काठमाडौं, माघ ११
सेयर लगानीकर्ताले तरलता अभाव झनै बढ्ने देखेपछि नाफा बुक गर्न तम्सीएका छन् । जसका कारण बजारमा एकै दिनमा १ सय अंकको गिराव आएको छ ।
बिशेषगरि सरकारले आन्तरिक ऋण उठाउन थालेपछि तरलता अभाव झनै बढ्ने देखिएको हो । साथै निर्वाचन पनि पछि धकेलिने देखिएपछि तरलता अभाव तत्कालै सहज नहुने देखिएको छ । यिनै भयका कारण सोमबार बजारमा सेयर बेच्नेहरु बढेकाले बजारमा ठूलो अंकको गिरावट आएको हो ।
अहिले बैक तथा वित्तीय क्षेत्रमा ९ अर्बको हाराहारीमा मात्रै लगानीयोग्य रकम छ । तर बैंकिङ क्षेत्रले यसरी लगानीयोग्य रकमको अभाव झेलिरहेका बेलामा तिनै बैंक तथा वित्त संस्थाबाट सरकारले पनि आन्तरिक ऋण उठाउने गरि प्रक्रिया अघि बढाएको छ ।
सरकारले यो आर्थिक वर्षमा कुल २ खर्ब ३९ अर्ब बराबरको आन्तरिक ऋण उठाउने लक्ष्य लिएकामा गत पुषसम्म ६ अर्ब उठाएको छ । यसबाहेक अबको चैत सम्ममा सरकारले थप १ खर्ब ऋण उठाउन लागेको छ । जसका लागि सोमबार १० अर्ब बराबरको बिकास ऋणपत्र २०८० जारी गर्ने सुचना जारी गरेको छ । राष्ट्र बैंक भने तरलतामा अभाव नपर्ने गरि ऋणपत्र जारी गर्ने दाबी गर्छ ।
अभावका बेलामा राष्ट्र बैंकले बैंकिङ क्षेत्रमा मौद्रिक उपाय मार्फत तरलता उपलब्ध गराउने बताएपनि ति प्रभावकारी भने हुन सकेका छैनन् । सरकारले खर्च गर्न नसकेपनि भोलिका दिनमा आइपर्ने खर्च टार्नका लागि यस्तो रकम जोहो गरेको हो । ढुकुटिमा भएको रकम खर्च नगर्ने र बजारमा भएको रकम पनि थप उठाउने हो भने लगानी बिस्तारमा झनै बाधा उत्पन्न हुन सक्नेछ ।
बजारमा ऋण उठाउनै लाग्दा सरकारले बिकास खर्चमा पनि तिब्रता दिने हो भने चाहि यसरी उठाएको ऋणले बजारमा ठूलो प्रभाव पार्ने छैन । तर, ऋण उठाएर सरकारले तत्काल रकम खर्चने देखिएको छैन ।
