आधारभूमि संवाददाता
काठमाडौं,पुष २४
जर्मन बुन्डेसलिगा फुटबलमा बायर्न म्युनिखले हार व्यहोरेको छ। घरेलु मैदानमा शुक्रबार राति भएको खेलमा बायर्न म्युनिख बोरुसिया मोन्चेनग्लादबाखसँग २-१ गोल अन्तरले पराजित भएको हो ।
बायर्नको मैदानमा मोन्चेनग्लादबाखलाई जित दिलाउन फ्लोरियन न्यूहाउस र स्टेफन लाइनरले एक-एक गोल गरे ।बायर्नका रोबर्ट लेवान्डोस्कीले एक गोल गरे ।
खेलमा पहिलो अग्रता बायर्नले लिएको थियो । खेलको १८ औं मिनेटमा लेवान्डोस्कीले गोल गर्दै बायर्नलाई सुरुवाती अग्रता दिलाएका थिए ।
तर,खेलको २७ औं मिनेटमा मोन्चेनग्लादबाखका फ्लोरियन न्यूहाउसले गोल गर्दै खेल बराबरीमा ल्याए।
त्यसपछि खेलको ३१ औं मिनेटमा स्टेफन लाइनरले गोल गर्दै मोन्चेनग्लादबाखलाई २-१ को जित दिलाए ।
हारपछि पनी बायर्नको १८ खेलबाट ४३ अंक छ र तालिकाको शीर्ष स्थानमा छ ।मोन्चेनग्लादबाखको १८ खेलबाट २२ अंक छ र तालिकाको ११ औं स्थानमा छ ।
