आधारभूमि संवाददाता
काठमाडौं, पुष १९
मल खरिदका क्रममा कृषि सामाग्री कम्पनी लिमिटेडको मिलेमतोमा अर्बौं रूपैयाँ भ्रष्टाचार भएको पाइएको छ । आइतबार अख्तियार दुरूपयोग तथा अनुसन्धान आयोगले कृषि सामग्री कम्पनी लिमिटेडका प्रबन्ध सञ्चालक नेत्र भण्डारीसहित १२ जनाविरुद्ध विशेष अदालत काठमाडौंंमा मुद्दा दायर गरेको छ ।
आयोगका अनुसार कृषि सामग्री कम्पनीका कर्मचारीहरू र आपूर्तिकर्तासमेतको मिलेमतोमा कम गुणस्तरको मललाई गुणस्तरयुक्त भनेर ल्याउने मात्रै होइन, बिना प्रतिस्पर्धा मलको गुणस्तरसमेत परीक्षण गरिएको पाइएको छ ।
उनीहरूले परीक्षणको गलत प्रतिवेदन बनाएर आपूर्तिकर्तालाई कूल रकमको ९० प्रतिशत जम्मा १ अर्ब ५३ लाख २२ हजार ४ सय रूपैयाँ भुक्तानी पनि गरिसकेका थिए ।
गुणस्तरहीन मल खरिद गरी बिक्री गर्ने भण्डारीसहित प्रबन्धक विष्णुप्रसाद पोखरेल, सहायक प्रबन्धक दुर्गाप्रसाद पाण्डे, उप–प्रबन्धक पुस्कर दिप बुढाथोकी समेतले कृषि सामग्री लिमिटेडलाई हानी नोक्सानी र आफूसमेतलाई गैरकानुनी लाभ लिने मनासाय लिई काम गरेको पुष्टि भएको छ ।
यसरी गलत प्रतिवेदन तयार गरेर देखाउनेमा नेपाल इन्भारोमेन्टल एण्ड साइन्टिफिक सर्भिसेस प्रा.लिका प्रबन्ध निर्देशक सलिल देवकोटा, सुनिलबाबु खत्री, महेन्द्र कुमार डागा, भोलानाथ चौधरी र मनोज आचार्य पनि यसमा संलग्न रहेको आयोगले पुष्टि गरेको छ।
कम्पनी र आपूर्तिकर्ताबीच भएको ठेक्का सम्झौताको स्पेशिफिकेशनको भन्दा कम गुणस्तरको डिएपी मल आपूर्ति भएको पुष्टि भएको छ । उक्त आपूर्तिकर्ता जोशी बिज हाउस प्रालिका कार्यकारी निर्देशक विनित जोशीमाथि पनि मुद्दा दायर भएको छ ।
उनीहरूबाट आयोगले एक अर्ब ५३ लाख २२ हजार ४ सय रूपैयाँ बिगो माग दाबी गरिएको छ ।
