आधारभूमि संवाददाता
काठमाडौं,मंसिर १४
बैंकहरुले ठूला सेयरलगानीकर्ताको ऋण घटाउँदै लगेको देखिएको छ। ठूला ऋणीहरुको ऋण पछिल्लो समय घट्दै गएको आकडा राष्ट्र बैकले प्रकाशन गरेसँगै यो पुष्टि भएको छ ।
१ करोड भन्दा माथिको यस्तो कर्जा अहिले १० दशमलव सात प्रतिशतले घटेको नेपाल राष्ट्र बैंक बताउँछ ।
७ अर्ब ८४ करोडले सेयर बजारमा जाने १ करोडभन्दा माथिको लगानी घटेको देखिन्छ । तर, ५० लाख देखि १ करोड रुपैयाँसम्मको ऋण ५ दशमलव सात प्रतिशतले र २५ देखि ५० लाखसम्ममो १२ दशमलव तीन र २५ लाख सम्मको १६ प्रतिशतले कर्जा भने बढेको देखिएको छ ।
तरलता अभावको स्थिती सिर्जना नहोस् र सेयरबजारमा अनाबश्यक मात्रामा लगानी नबढोस् भनेर राष्ट्र बैंकले चालु आर्थिक वर्षको मौद्रिक नीति मार्फत यस्तो कर्जामा कडाई गरेको छ। बैंक तथा वित्त संंस्थाले एक ब्यक्तिलाई पुरै वित्तीय प्रणालीबाट १२ करोड र एकै बैंकबाट ४ करोड भन्दा बढि लगानी गर्न पाउँदैनन् ।
जसको फलस्वरुप पछिल्लो समय यस्तो क्षेत्रमा जाने कर्जामा कमि आएको देखिन्छ । नेपाल राष्ट्र बैंकको आकडा अनुसार यस्तो कर्जा चार महिनाको अवधिमा ४ दशमलव एक प्रतिशतले कम भएको छ ।
गत असारसम्ममा बैंक तथा वित्त संस्थाले सेयरबजारमा १ खर्ब ६२ अर्ब लगानी गरेका थिए । जुन लगानी गत कात्तिकमा आउँदासम्ममा ४ अर्ब ३३ करोडले कमि आउँदै १ खर्ब १९ अर्बमा सिमित भएको छ।
नेपाल राष्ट्र बैंकले दिएको निर्देशन बमोजिम ठूलो खालका लगानीमा बैंकहरुले साइज घटाउन खोज्दा ठूलै परिमाणमा गएका ऋणहरु घटेका देखिएका हुन् ।
अर्थात ठूला सेयर लगानीकर्ताको ऋण घटाएका बैंकहरुले साना सेयर लगानीकर्तामा प्रवाह गर्ने ऋणमा भने कमि ल्याएका छैनन् । राष्ट्र बैंकको नीतिले सिमित सेयर लगानीकर्ताले बैंकको रकम उपयोग गर्नेमा कमि ल्याउँदै साना लगानीकर्तामा भने लगानी बढाएको देखिन्छ ।
