आधारभूमि संवाददाता
काठमाडौँ, पुस १२
इंग्लिस प्रिमियर लिग फुटबलमा चेल्सीले जित निकालेको छ । आइतबार राति भएको खेलमा चेल्सीले एस्टन भिल्लालाई उसकै घरेलु मैदानमा ३-१ गोलले पराजित गरेको हो ।
चेल्सीलाई जित दिलाउन जोर्गिन्होले दुई गोल गरे भने रोमेलु लुकाकुले एक गोल गरे ।
खेलको २८ औँ मिनेटमा चेल्सीका रिस जेम्सले आत्मघाति गोल गरेपछि एस्टन भिल्लाले अग्रता लिएको थियो।
तर, खेलको ३४ औँ मिनेटमा चेल्सीका जोर्गिन्होले पेनाल्टीमा गोल गर्दै खेल बराबरीमा फर्काए ।
दोस्रो हाफको ५६ औँ मिनेटमा रोमेलु लुकाकुले गोल गर्दै टोलीलाई २-१ ले अघि बढाए।लुकाकु दोस्रो हाफमा बैकल्पिक खेलाडी रूपमा मैदान छिरेका थिए।उनले कोभिड-१९ का कारण तीन खेल गुमाएका थिए ।
त्यसपछि इन्जुरी समयको तेस्रो मिनेटमा जोर्गिन्होले पेनाल्टीमा व्यक्तिगत दोस्रो गोल गर्दै टोलीलाई ३-१ को जित दिलाए ।
जितसंगै चेल्सीले १९ खेलबाट ४१ अंक जोडेको छ र तेस्रो स्थानमा छ ।पराजित एस्टन भिल्लाको १८ खेलबाट २२ अंक छ र ११ औं स्थानमा छ ।
