आधारभूमि संवाददाता
काठमाडौं, कात्तिक १६
बैंकिङ क्षेत्रमा अहिले १७ अर्ब मात्रै लगानीयोग्य रकम रहेको छ । असार यता बैंकहरुले ३ खर्ब ५१ अर्ब बराबर कर्जा प्रवाह गरेका छन् । र, यहि बिचमा ७० अर्ब मात्रै निक्षेप संकलन भएको छ।
उद्योग बाणिज्य महासंघका अध्यक्ष शेखर गोल्छाले भने सरकारले राजस्व उठाउने तर गर्नुपर्ने खर्च बढाउन नसकेकाले तरलता अभावको स्थिती आएको बताएका छन् । लगानीयोग्य रकमको अभावसँगै कर्जाको ब्याजदर माथि जाने हो भने सरकारले यो वर्ष लक्ष्य राखेको सात प्रतिशतको बृद्धि संभव नभएको उनको तर्क छ ।
बैकहरुले स्रोत भन्दा बढि कर्जा प्रवाह गरेकाले अहिले तरलता अभावको स्थिती सिर्जना भएको गभर्नर महाप्रसाद अधिकारीले बताएका छन् ।
यसरी गरिएको लगानीबाट दिर्घकालमा आउन सक्ने समस्याका बारेमा समयमै बैंकहरुले नसोचेका कारण अहिले बैंकिङ क्षेत्रमा तरलता अभावको स्थिती सिर्जना भएको नेपाल राष्ट्र बैंकका गर्भनर महाप्रसाद अधिकारीको तर्क छ ।
नेपाल आर्थिक पत्रकार समाजले आयोजना गरेको तरलता अभाव कारण र समाधान विषयक अन्र्तक्रिया कार्यक्रममा बोल्दै गभर्नर नेपालले बैंकहरुलाई संयमित भएर लगानी गर्न आग्रह गरेका छन् ।
गत वर्ष महामारीका कारण थुप्रिएको निक्षेपलाई बैंकहरुले सेयर लगानीकर्ताहरुलाई फोन गरेर बोलाएर ऋण लान आग्रह गरेका थिए ।
बैंकर्स संघका अध्यक्ष भुवन कुमार दाहालले भने असार यता बैंकहरुले अनुमान गरेजसरी निक्षेप नआएको तर कर्जा भने अनुमान गरेभन्दा बढि आएकाले यस खालको समस्या आएको बताएका छन् ।
साथै उनले अब कर्जा के कस्तो क्षेत्रमा केन्द्रित गर्ने र केमा अलि कम गर्ने भनेर नियामक निकायले सोच्नुपर्ने बताएका छन् ।
