आधारभूमि संवाददाता
काठमाडौं, १३ कार्तिक
फ्रेन्च लिग वान फुटबलमा शीर्ष स्थानको पेरिस सेन्ट जर्मेन (पीएसजी)ले १० अंकको अग्रता बनाएको छ । शुक्रबार राति ले पार्क डेस प्रिन्सेस स्टेडियममा भएको खेलमा पीएसजीले लिलेलाई २-१ गोलले पराजित गरेको हो ।
घरेलु मैदानमा पीएसजीलाई जित दिलाउन मार्किन्होस र एन्जेल डि मारियाले एक-एक गोल गरे।लिलेका जोनाथन डेभिडले एक गोल गरेका थिए।
खेलमा पहिलो अग्रता भने लिलेले लिएको थियो।खेलको ३१ औँ मिनेटमा लिलेका जोनाथन डेभिडले गोल गर्दै टोलीलाई सुरुवाती अग्रता दिलाएका थिए ।
दोस्रो हाफको ७४ औं मिनेटमा पीएसजीका मार्किन्होसले गोल गर्दै खेल बराबरीमा फर्काए ।
त्यसपछि खेलको ८८ औं मिनेटमा पीएसजीका एन्जेल डि मारियाले गोल गर्दै टोलीलाई २-१ को जित दिलाए ।
जितसंगै पीएसजीले १२ खेलबाट ३१ अंक जोडेको छ र शीर्ष स्थानमा १० अंकको अग्रता बनाएको छ ।दोस्रो स्थानको लेन्सको ११ खेलबाट २१ अंक छ ।पराजित लिलेको १२ खेलबाट १५ अंक छ र ११ औं स्थानमा छ ।
