आधारभूमि संवाददाता
काठमाडौँ, १३ असोज
यूईएफए च्याम्पियन्स लिग फुटबलमा एफसी सेरिफले रियल मड्रिडलाई उसकै घरेलु मैदानमा पराजित गरेको छ । मंगलबार राति भएको समूह ‘डी’ को खेलमा एफसी सेरिफले रियल मड्रिडलाई २-१ गोल अन्तरले पराजित गरेको हो ।
रियलको मैदानमा सेरिफलाई जित दिलाउन यख्शिबोएव र सेबास्टियन थिलले एक एक गोल गरे।रियलका करीम बेन्जेमाले एक गोल गरे ।
खेलको २५ औं मिनेटमा सेरिफका यख्शिबोएवले गोल गर्दै टोलीलाई सुरुवाती अग्रता दिलाएका थिए ।
दोस्रो हाफको ६५ औं मिनेटमा रियलका करीम बेन्जेमाले पेनाल्टीमा गोल गर्दै खेल १-१ को बराबरीमा फर्काए।
तर, खेलको ८९ औं मिनेटमा सेरिफका सेबास्टियन थिलले गोल गर्दै टोलीलाई २-१ को जित दिलाए ।
जितसँगै समूह ‘डी’ मा रहेको सेरिफले दुई खेलबाट छ अंक जोडेको छ र समूहको शीर्ष स्थानमा छ ।पराजित रियल मड्रिडको दुई खेलबाट तीन अंक छ र समूहको दोस्रो स्थानमा छ ।