आधारभूमि संवाददाता
काठमाडौँ, १३ असोज
च्याम्पियन्स लिग फुटबलमा पेरिस सेन्ट जर्मेन (पीएसजी) ले जित निकालेको छ । मंगलबार राति भएको समूह ‘ए’ को खेलमा पीएसजीले म्यानचेस्टर सिटीलाई २-० गोल अन्तरले पराजित गरेको हो ।
घरेलु मैदानमा पीएसजीलाई जित दिलाउन इद्रिसा गुई र लियोनल मेस्सीले एक-एक गोल गरे ।
खेलको आठौं मिनेटमा इद्रिसा गुईले गोल गर्दै टोलीलाई सुरुवाती अग्रता दिलाएका थिए ।
त्यसपछि खेलको ७४ औं मिनेटमा एमबाप्पेको पासमा लियोनल मेस्सीले पिएसजीका लागि पहिलो गोल गर्दै टोलीलाई २-० को जित दिलाए । मेस्सी यसै सिजनमा स्पेनिस क्लब बार्सिलोनाबाट पिएसजी आएका थिए ।
जितसँगै समूह ‘ए’ मा रहेको पीएसजीले दुई खेलबाट चार अंक जोडेको छ र समूहको शीर्ष स्थानमा छ ।पराजित सिटीको दुई खेलबाट तीन अंक छ र समूहको तेस्रो स्थानमा छ ।