आधारभूमि संवाददाता
काठमाडौँ, ४ असोज
फ्रेन्च लिग वान फुटबलमा पेरिस सेन्ट जर्मेन (पीएसजी) ले लगातार छैठौं जित निकालेको छ । आइतबार राति भएको खेलमा पीएसजीले लियोनलाई २-१ गोल अन्तरले पराजित गरेको हो ।
पीएसजीलाई जित दिलाउन नेयमार र माउरो इकार्डीले एक-एक गोल गरे ।लियोनका लुकास पक्वाटाले एक गोल गरे ।
खेलमा पहिलो अग्रता लियोनले लिएको थियो । खेलको ५४ औँ मिनेटमा लियोनका लुकास पक्वाटाले गोल गर्दै टोलीलाई सुरुवाती अग्रता दिलाएका थिए ।
तर,खेलको ६६ औं मिनेटमा पीएसजीका नेयमारले पेनाल्टीमा गोल गर्दै खेल बराबरीमा ल्याए।
त्यसपछि इन्जुरी समयको तेस्रो मिनेटमा पीएसजीका माउरो इकार्डीले गोल गर्दै टोलीलाई २-१ को सहज जित दिलाए ।
जितसँगै पीएसजीले छ खेलबाट १८ अंक जोडेको छ र तालिकाको शीर्ष स्थानमा छ ।पराजित लियोनको छ खेलबाट आठ अंक छ र तालिकाको आठौं स्थानमा छ ।