आधारभूमि संवाददाता
काठमाडौं, भदौ ७
सोमबार थप १ हजार ८०१ जनामा कोरोना सङ्क्रमण पुष्टि भएको छ ।
स्वास्थ्य तथा जनसङ्ख्या मन्त्रालयको अनुसार पछिल्लो २४ घण्टामा देशभरिका विभिन्न प्रयोगशालामा ११ हजार ३२६ जनाको नमूना परीक्षण गर्दा उक्त सङ्ख्यामा कोरोना सङ्क्रमण पुष्टि भएको हो । यो सँगै हालसम्म सङ्क्रमितको सङ्ख्या सात लाख ४८ हजार ९८१ पुगेको छ ।
त्यस्तै पछिल्लो २४ घण्टामा पीसीआर विधिबाट ११ हजार ३२६ जनाको परीक्षण भएको छ । हालसम्म ३८ लाख ३९ हजार ३९५ जनाको पीसीआर परीक्षण गरिएको छ।
थप १९२४ जना डिस्चार्ज
नेपालमा पछिल्लो २४ घण्टामा १९२४ जनाले कोरोना जितेका छन् ।
यो सँगै हालसम्म कोरोनामुक्त भई डिस्चार्ज हुनेको कूल सङ्ख्या सात लाख ९७ पुगेको छ ।
थप २४ को मृत्यु
पछिल्लो २४ घण्टामा २४ जनाको मृत्यु भएको छ। यो सँगै हालसम्म नेपालमा कोरोनाबाट ज्यान गुमाउनेको संख्या १० हजार ५३३ पुगेको छ।
