आधारभूमि संवाददाता
काठमाडौं, असार ४
ब्राजिलले कोपा अमेरिका फुटबलमा लगातार दोस्रो जित निकालेको छ ।शुक्रबार बिहान भएको खेलमा ब्राजिलले पेरुलाई ४-० गोल अन्तरले पराजित गरेको हो ।
ब्राजिललाई जित दिलाउन एलेक्स सान्ड्रो,नेयमार,एभर्टन रिबेरो र रिचार्लिसनले एक-एक गोल गरे।ब्राजिलले एक गोल पहिलो हाफ र तीन गोल दोस्रो हाफमा गरेको हो ।
खेलको १२ औँ मिनेटमा एलेक्स सान्ड्रोले गोल गर्दे टोलीलाई सुरुवाती अग्रता दिलाएका थिए।
दोस्रो हाफको ६८ औं मिनेटमा नेयमारले गोल गर्दै टोलीलाई २-० ले अघि बढाए।
खेलको ८९ औँ मिनेटमा एभर्टन रिबेरोले गोल गर्दै टोलीलाई ३-० ले अघि बढाए।
त्यसपछि इन्जुरी समयमा रिचार्लिसनले गोल गर्दै टोलीलाई ४-० को सहज जित दिलाए ।
जितसँगै समूह ‘ए’मा रहेका ब्राजिलले २ खेलबाट ६ अंक जोडेको छ र तालिकाको शीर्ष स्थानमा छ ।पराजित पेरु अंक विहीन तालिकाको पुछारमा छ ।
पहिलो खेलमा ब्राजिलले भेनेजुएलालाई ३-० गोल अन्तरले पराजित गरेको थियो ।
