आधारभुमि संवाददाता
काठमाडौं, बैशाख २०
महामारीका कारण बिदेशबाट नेपालका लागि भनेर आउने कामदारको मागमा नै ६५ प्रतिशतले कमि आएको छ । यसैत अघिल्लो कोरोना महामारीका कारण अन्यौलता छाइरहेका बेला फेरी दोस्रो लहरले झनै अनिश्चीतता बनाएको छ।
सरकारले बैशाख २२ गतेबाट नै अन्तर्राष्ट्रिय उडान रोक्ने तयारी गर्दैछ । जसले विदेशबाट माग भएका कामदार समेत पठाउन कठिन हुने देखिएको छ । एक त विदेशबाट आएका माग नै कमि छन् । त्यसमाथि बढ्दो महामारीले कामदार पठाउन नै असहज भएको छ ।
बैदेशिक रोजगार विभागका अनुसार अघिल्लो वर्ष ३ लाख २९ हजारको माग आएकोमा यो वर्ष १ लाख १४ हजारको मात्र आएको विभाग बताउँछ । यो आर्थिक वर्षको चैतसम्म वैदेशिक रोजगारीका लागि आउने कामदार माग संख्या ६५ प्रतिशतले घटेको छ ।
त्यस्तै आर्थिक वर्ष २०७६/०७७ मा संस्थागत र व्यक्तिगत गरी १ लाख ९० हजार श्रमिक गएकोमा यो वर्षको ९ महिनामा १ लाख २४ हजार मात्र श्रमिक वैदेशिक रोजगारीमा गएका छन् ।
जताततै अन्यौलता
इजरायलको एक हजार कोटाका लागि पठाउने भन्नेमा अहिले अन्योलता छाएको छ । श्रम मन्त्रालयले कोरोना महामारीलाई देखाउँदै कार्यविधिको काम नै अल्झाएर राखिएको छ ।
त्यस्तै नेपालीको प्रमुख श्रम गन्तव्य मलेसियाले पनि संक्रमित देशबाट श्रमिक नलिने नीतिबमोजिम नेपाललाई खतराको क्षेत्रमा राखेको छ ।
महामारीअघि मलेसियाबाट आएका मागपत्रको म्याद नै सकिने क्रममा छ । त्यस्तै कुवेतले पनि कामदार लिएको छैन ।
साउदी अरेबियामा ६० हजार बढी श्रमिकको माग भए पनि त्यससम्बन्धी करिब २३ सयवटा फाइल कर्मचारी र अरु समस्या देखाएर अगाडि बढाइएको छैन ।
१० हजार युवा कोरियाको आशमा
अहिले करिब १० हजार युवा दक्षिण कोरिया जान तयारी अवस्थामा छन् । एक महिनाअघि कोरियाले नयाँ परीक्षा लिने र कोरिया लैजाने संकेत दिएको थियो । जसका लागि करिब ६ हजार युवाको भिसाको म्याद पनि थपेको थियो । तर अहिले नेपालमा संक्रमण बढेपछि पुनः नेपाल खतरा सूचीमा पुगेको छ । कहिले त्यहाँ जाने अनुमति आउछ भन्ने चाहि अझै निश्चीत छैन ।
