आधारभूमि संवाददाता
काठमाडौ, १७ वैशाख
युरोपा लिग फुटबलको सेमिफाइनलको पहिलो लेगमा आर्सनल भिल्ला रियलसँग पराजित भएको छ ।बिहीबार राति भिल्ला रियलको घरेलु मैदानमा भएको खेलमा आर्सनल भिल्ला रियलसँग २-१ ले पराजित भएको हो ।
भिल्ला रियललाई जित दिलाउन मनु ट्राइगुरोस र राउल अल्बियोलले एक-एक गोल गरे ।आर्सनलको निकोलस पेपेले एक गोल फर्काए ।
खेलको पाँचौ मिनेटमा मनु ट्राइगुरोसले गोल गर्दै भिल्ला रियललाई सुरुवाती अग्रता दिलाएका थिए।
खेलको २९ औं मिनेटमा राउल अल्बियोलले गोल गर्दै टोलीलाई २-० को अग्रता दिलाए ।
दोस्रो हाफको ५८ औं मिनेटमा आर्सनल १० खेलाडीमा समेटिएको थियो ।आर्सनलका डानि सिबेलोसले रातो कार्ड खाँदै मैदानबाट बाहिरिएका थिए ।
खेलको ७३ औं मिनेटमा आर्सनलका निकोलस पेपेले पेनाल्टीमा गोल गर्दै २-१ को स्थितिमा ल्याए ।
खेलको ८० औं मिनेटमा भिल्ला रियल पनि १० खेलाडीमा समेटिएको थियो ।भिल्ला रियलका इटिन कापोएले रातो कार्ड खाँदै मैदानबाट बाहिरिएका थिए ।
त्यसपछि बाकी समयमा कुनै गोल हुन सकेन र भिल्ला रियलले जित निकालेको हो ।
अब दोस्रो लेग मे ७ मा आर्सनलको मैदानमा हुनेछ ।
