आधारभूमि संवाददाता
काठमाडौं, चैत १२
जर्मन बुन्डेसलिगा फुटबलमा शीर्ष स्थानको बायर्न म्युनिख मेन्जसँग पराजित भएको छ। शनिबार राति भएको खेलमा मेन्जले बायर्न म्युनिखलाई २-१ गोलले पराजित गरेको हो ।
मेन्जलाई जित दिलाउन जोनाथन बुकर्ट र रोबिन क्वेसनले एक एक गोल गरे ।बायर्नको रोबर्ट लेवान्डोव्स्कीले एक गोल फर्काए ।
खेलको तेस्रो मिनेटमा जोनाथन बुकर्टले गोल गर्दै मेन्जलाई सुरुवाती अग्रता दिलाएका थिए । ३७ औं मिनेटमा रोबिन क्वेसनले गोल गर्दै मेन्जको अग्रता दोब्बर पारे ।
दोस्रो हाफको इन्जुरी समयमा बायर्नका रोबर्ट लेवान्डोव्स्कीले गोल गर्दै २-१ को स्थितिमा ल्याए ।त्यसपछि बाकी समयमा कुनै गोल हुन सकेन र मेन्जले जित निकालेको हो ।
हारपछि पनि बायर्न शीर्ष स्थानमा छ।बायर्नको ३१ खेलबाट ७१ अंक छ । मेन्जको ३० खेलबाट ३४ अंक छ र १२ औं स्थानमा छ ।दोस्रो स्थानको आरबी लेपजिगको ३० खेलबाट ६१ अंक छ ।
