आधारभूमि संवाददाता
काठमाडौ, चैत २१
इंग्लिस प्रिमियर लिग फुटबलमा चेल्सी वेस्ट ब्रोमसँग पराजित भएको छ । शनिबार भएको खेलमा चेल्सीलाई वेस्ट ब्रोमले उसकै घरेलु मैदानमा ५-२ गोलले पराजित गरेको हो ।
वेस्ट ब्रोमलाई जित दिलाउन मैथियस परेरा र क्यालम रोबिन्सनले दुई-दुई गोल र एमबाए डायग्नले एक गोल गरे ।चेल्सीका क्रिश्चियन पुलिसिक र मेसन माउन्टले एक-एक गोल गरे ।
खेलमा पहिलो अग्रता भने चेल्सीले लिएको थियो।खेलको २७ औं मिनेटमा क्रिश्चियन पुलिसिकले गोल गर्दै चेल्सीलाई सुरुवाती अग्रता दिलाएका थिए।
खेलको २९ औं मिनेटमा चेल्सी १० खेलाडीमा समेटिएको थियो । चेल्सीका थाआगो सिल्भाले रातो कार्ड खाँदै मैदानबाट बाहिरिएका थिए ।
पहिलो हाफको इन्जुरी समयमा मैथियस परेराले दुई गोल गर्दै वेस्ट ब्रोमलाई २-१ ले अघि बढाए।
दोस्रो हाफको ६३ औँ मिनेटमा क्यालम रोबिन्सनले गोल गर्दै वेस्ट ब्रोमलाई ३-१ ले अघि बढाए। ६८ औँ मिनेटमा एमबाए डायग्नले अब्राहमले गोल गर्दै टोलीलाई ४-१ ले अघि बढाए।
खेलको ७१ औं मिनेटमा चेल्सीका मेसन माउन्टले गोल गर्दै ४-२ को स्थितिमा ल्याए ।
त्यसपछि दोस्रो हाफको इन्जुरी समयमा वेस्ट ब्रोमका क्यालम रोबिन्सनले व्यक्तिगत दोस्रो गोल गर्दै टोलीलाई ५-२ को जित दिलाए ।
हारसँगै चेल्सीले ३० खेलबाट ५१ अंक जोडेको छ र चौंथो स्थानमा छ ।वेस्ट ब्रोमको २१ अंक छ र पुछारमा छ ।
