आधारभूमि संवाददाता
काठमाडौं, चैत १६
नेपालले थ्री नेसन्स कप अन्तराष्ट्रिय फुटबलको उपाधि जितेको छ । सोमबार भएको खेलमा नेपालले बंग्लादेशलाई २-१ गोलले पराजित गर्दै थ्री नेसन्स कपको उपाधि जितेको हो ।
दशरथ रंगशालामा भएको खेलमा नेपाललाई जित दिलाउन सन्जोग राई र विशाल राईले एक-एक गोल गरे । बंगलादेशका महबुबुर रहमानले एक गोल फर्काए ।
खेलको १८ औं मिनेटमा सञ्जोग राईले गोल गर्दै टोलीलाई सुरुवाती अग्रता दिलाएका थिए । राईले सुनिल वलको कर्नरमा गोल गरेका हुन्।त्यसपछि ४२ औं मिनेटमा विशाल राईले गोल गर्दै टोलीको अग्रता दोब्बर पारे ।
खेलको ८३ औं मिनेटमा बंगलादेशका महबुबुर रहमानले गोल गर्दै २-१ को स्थितिमा ल्याएका थिए ।त्यसपछि बाँकि समयमा कुनै गोल हुन सकेन र नेपालले जित निकालेको हो ।
योसँगै नेपालले ३७ वर्षपछि पहिलोपटक घरेलु मैदानमा उपाधि जितेको हो ।यस अघि नेपालले सन् १९८४ को सागमा घरेलु मैदानमा उपाधि जितेको थियो ।
जितसँगै नेपालले पाँच हजार डलर र उपविजेता बंगलादेशले तीन हजार डलर पुरस्कार प्राप्त गरेको छ।
