काठमाडौ, चैत १४
पूर्व प्रधानमन्त्री तथा माओवादी केन्द्रका अध्यक्ष पुष्पकमल दाहाल(प्रचण्ड) आज शुक्रबार नर्भिक अस्पताल पुग्नुभएको छ ।
प्रचण्ड आफ्ना पार्टीका एक केन्द्रीय स्तरका नेताकी बिरामी आमालाई भेट्न थापाथली स्थित नर्भिक इन्टरनेशनल हस्पिटल पुग्नुभएको हो । दमको समस्याबाट प्रताडित माओवादी केन्द्रका केन्द्रीय सदस्य तथा माओवादी निकट नेवा राष्ट्रिय मुक्ति मोर्चाका केन्द्रीय उपाध्यक्ष दीपेन्द्र श्रेष्ठकी ८५ वर्षीया आमा रुक्मिणी श्रेष्ठको नर्भिकमा ४ दिनदेखि उपचार भइरहेको छ । उनैलाई भेट्न प्रचण्ड नर्भिक पुग्नुभको हो ।
नर्भिक पुग्नुभएका प्रचण्डले बिरामी आमा, नेता श्रेष्ठ र आफन्तलाई भेट्नुभएको थियो । उहाँले अस्पतालमा १५ मिनेट समय बिताउनुभएको माओवादी केन्द्रका केन्द्रीय सदस्य दीपेन्द्र श्रेष्ठले जानकारी दिनुभयो ।
कडा सुरक्षा घेराबीच अस्पताल पुग्नुभएका प्रचण्डले बिरामी र आफन्तलाई पार्टीको काममा बढी व्यस्त हुन परिरहेको उल्लेख गर्दै आइरहन नभ्याउने भन्दै बिरामीको शीघ्र स्वास्थ्य लाभको कामना गर्नुभएको थियो । श्रेष्ठको उपचार नर्भिक अस्पतालका चिकित्सक डा. रमेशकुमार चोखानी नेतृत्वको टिमले गरिरहेको छ ।
