आधारभूमि संवाददाता
काठमाडौँ,२७ फागुन
स्पेनिस ला लिगा फुटबलमा शीर्ष स्थानको एट्लेटिको मड्रिडले ६ अंकको अग्रता बनाएको छ । बुधबार राति भएको खेलमा एट्लेटिको मड्रिडले एथलेटिक बिलबाओलाई २-१ गोलले पराजित गरेको हो ।
एट्लेटिको मड्रिडलाई जित दिलाउन लुइस सुआरेज र मार्कोस लोरेन्टेले एक-एक गोल गरे।बिलबाओको इकर मुनिएनले एक गोल गरेका थिए।
खेलमा पहिलो अग्रता बिलबाओले लिएको थियो । खेलको २१ औं मिनेटमा इकर मुनिएनले गोल गर्दै बिलबाओलाई अग्रता दिलाएका थिए ।तर,पहिलो हाफको इन्जुरी समयमा एट्लेटिकोका मार्कोस लोरेन्टेलेले गोल गर्दै खेल बराबरीमा फर्काए ।
दोस्रो हाफको ५१ औं मिनेटमा लुइस सुआरेजले पेनाल्टीमा गोल गर्दै एट्लेटिकोलाई २-१ ले अघि बढाए।त्यसपछि कुनै गोल हुन सकेन र एट्लेटिकोले जित निकालेको हो ।
जितसँगै एट्लेटिकोले २६ खेलबाट ६२ अंक जोडेको छ र शीर्ष स्थानमा ६ अंकको अग्रता बनाएको छ ।दोस्रो स्थानको बार्सिलोनाको २६ खेलबाट ५६ अंक छ ।पराजित एथलेटिक बिलबाओको २६ खेलबाट ३३ अंक छ र आठौं स्थानमा छ ।
