आधारभूमि संवाददाता
काठमाडौं, फागुन २४
महामारीका बिचमा पनि बढेको आर्थिक गतिबिधीले बजारमा अधिक तरलताको स्थिती हटाएको छ। अहिले बैंकमा जम्मा ६० अर्ब बराबरको तरलता रहेको नेपाल राष्ट्र बैंकले जनाएको छ ।लामो समय पर्ख र हेरको अवस्थामा रहेका लगानीकर्ताले अहिले लगानी गर्न सुरु गरेका छन् । व्यवसाय सुचारु गर्नका लागि समेत उनिहरुले बैंकबाट ऋण निकाल्न सुरु गरेका छन् । जसका कारण बैंकमा अहिले कर्जाको उच्च माग रहेको छ ।
नेपाल राष्ट्र बैंकका अनुसार, साउन यता बैंकहरुबाट प्रवाह हुने कर्जा १७ प्रतिशतले बढेको छ । साउनको सुरुवातमा ३२ खर्ब कर्जा प्रवाह भएकोमा अहिले बढेर ३७ खर्ब ५० अर्ब पुगेको छ ।यो वर्षको आठ महिनामै साढे ५ खर्ब बराबरको कर्जा गएको छ । तर यस्तो कर्जा पुषको १५ अर्थात मध्य पुषपछि मात्रै गएको बैंकर्स बताउँछन् ।
नेपाल राष्ट्र बैंकका अनुसार पुष १५ सम्ममा बैंक तथा वित्तीय क्षेत्रमा २ खर्ब बराबरको तरलता थियो । जुन अहिले ६० अर्बमा सिमित हुनुले १ खर्ब ४० अर्ब कर्जा प्रदान भएको बुझिन्छ। अर्थात डेढ महिनामा नै झन्डै डेढ खर्ब बराबरको ऋण प्रवाह हुनुले पछिल्लो समय कर्जाको माग ह्वात्तै बढेको मान्न सकिन्छ ।
यसबाहेक राष्ट्र बैंकले थप ८५ अर्ब बराबरको पुर्नकर्जा बजारमा पठाएको छ । यसरी हेर्दा बजारमा २ खर्ब २५ अर्ब बराबरको थप कर्जा प्रवाह भएको मान्न सकिन्छ । आर्थिक गतिबिधी बढेकाले बैंकहरुबाट प्रवाह हुने कर्जा बढेको हो । पछिल्लो समय आर्थिक गतिबिधी बढेको र यसले कर्जा बढेको राष्ट्र बैंक बताउँछ ।
अहिले आयात बढेको छ । जसका कारण आयातमा जाने कर्जामा पनि भारि बृद्धि भएको हो । यसबाहेक अहिले घरजग्गाको कारोबारमा पनि राम्रो बृद्धि देखिएको छ । , जसले पनि ऋण प्रवाह ह्वात्तै बढाएको हो ।साथै उद्योगधन्दा पनि चैतको तुलनामा धेरैजसो सञ्चालन आएकोले औद्योगिक गतिबिधी बढेको राष्ट्र बैंकले गरेको अध्ययनको निष्कर्ष छ । बिदेशी पर्यटकको आगमन हुन नसकेकाले पर्यटन बाहेक अन्य क्षेत्र पुरानै अवस्थामा फर्कन लागेका छन् ।
पर्यटन क्षेत्रले पनि आगामी दिनमा बैंकहरुबाट कर्जा लाने संभावना छ । बिश्वभर लगाइएको कोरोना खोपका कारण अब कोरोना सामान्य हुँदै जाने र यसपछि मानिसहरु घुम्न निस्कीने हुन्छ ।
