आधारभूमि संवाददाता
काठमाडौं, फागुन २०
बार्सिलोना स्पेनिस कोपा डेल रे फुटबलको फाइनलमा प्रवेश गरेको छ । बुधबार राति
घरेलु मैदान क्याम्प नोउमा भएको सेमिफाइनलको दोस्रो लेगमा बार्सिलोनाले सेभियालाई ३-० गोलले पराजित गर्दै समग्रमा ३-२ को जित निकाल्दै फाइनलमा प्रवेश गरेको हो ।
बार्सिलोनालाई जित दिलाउन ओउस्माने डेम्बेले,जेरार्ड पिकाइ र मार्टिन ब्रेथवेटले एक-एक गोल गरे।बार्सिलोनालाई सेभियाले पहिलो लेगमा २-० गोलले पराजित गरेको थियो ।
खेलको १२ औं मिनेटमा ओउस्माने डेम्बेलेले गोल गर्दै बार्सिलोनालाई सुरुवाती अग्रता दिलाएका थिए ।
दोस्रो हाफको इन्जुरी समयमा सेभियाका फर्नान्डोले रातो कार्ड पाएपछि सेभिया १० खेलाडीमा समेटिएको थियो ।
लगतै इन्जुरी समयको चौंथो मिनेटमा जेरार्ड पिकाइले गोल गर्दै बार्सिलोनालाई २-० को अग्रता दिलाए ।पिकाइले गोल गरेसंगै दुई टोलि बीचको खेल समग्रमा २-२ को अवस्थामा पुगेको थियो
र खेल अतिरिक्त समयमा धकेलिएको थियो ।
अतिरिक्त समयमा मार्टिन ब्रेथवेटले गोल गर्दै बार्सिलोनालाई ३-० को जित दिलाए ।
खेलको १०३ औं मिनेटमा सेभियाका लुक डी जोङले रातो कार्ड खाँदै मैदानबाट बाहिरिएपछि एट्लान्टा ९ खेलाडीमा समेटिएको थियो ।
जितसँगै बार्सिलोनाले सेभियालाई समग्रमा ३-२ ले पराजित गर्दै फाइनलमा प्रवेश गरेको छ ।बार्सिलोनाले अब उपाधिको लागि एथ्लेटिक बिल्बाओ र लेभान्टेबीचको विजेतासँग खेल्नेछ ।
