आधारभूमि संवाददाता
काठमाडौं, फागुन १५
जर्मन बुन्डेसलिगा फुटबलमा शीर्ष स्थानको बायर्न म्युनिखले सानदार जित निकालेको छ । शनिबार राति भएको खेलमा बायर्न म्युनिखले एफसी कोल्नलाई ५-१ गोलले पराजित गरेको हो ।
बायर्न म्युनिखलाई जित दिलाउन रोबर्ट लेवान्डोव्स्की र सर्ज ग्नब्र्यले दुई-दुई गोल र एरिक मैक्सिमले एक गोल गरे। एफसी कोल्नका एलिस सिक्रीले एक गोल गरे।
खेलको १८ औं मिनेटमा एरिक मैक्सिमले गोल गर्दै बायर्नलाई सुरुवाती अग्रता दिलाएका थिए । ३३ औं मिनेटमा रोबर्ट लेवान्डोव्स्कीले गोल गर्दै बायर्नको अग्रता दोब्बर पारे ।
दोस्रो हाफको ४९ औं मिनेटमा एफसी कोल्नका एलिस सिक्रीले गोल गर्दै २-१ को स्थितिमा ल्याए । ६५ औं मिनेटमा रोबर्ट लेवान्डोव्स्कीले व्यक्तिगत दोस्रो गोल गर्दै टोलीलाई ३-१ ले अघि बढाए।
खेलको ८२ औं मिनेटमा सर्ज ग्नब्र्यले गोल गर्दै टोलीलाई ४-१ ले अघि बढाए।लगत्तै,८६ औं मिनेटमा सर्ज ग्नब्र्यले व्यक्तिगत दोस्रो गोल गर्दै बायर्नलाई ५-१ को सानदार जित दिलाए ।
जितसँगै बायर्नले २३ खेलबाट ५२ अंक जोडेको छ र शीर्ष स्थानमा छ ।पराजित एफसी कोल्नको २१ अंक छ १४ औँ स्थानमा छ ।
