आधारभूमि संवाददाता
काठमाडौं, फागुन १२
जर्मन क्लब बायर्न म्युनिखले च्याम्पियन्स लिग फुटबलको अन्तिम १६ को पहिलो लेगमा सानदार जित निकालेको छ ।मंगलबार राति भएको खेलमा बायर्न म्युनिखले लाजियोलाई उसकै मैदानमा ४-१ गोलले पराजित गरेको हो ।
बायर्न म्युनिखलाई जित दिलाउन रोबर्ट लेवान्डोव्स्की,जमाल मुसियाला र लोरी सानेले एक-एक गोल गरे भने बायर्नले एक गोल आत्मघाती गोलको उपहार पाएको थियो ।
खेलको नवौं मिनेटमा रोबर्ट लेवान्डोव्स्कीले गोल गर्दै बायर्नलाई अग्रता दिलाएका थिए ।२४ औं मिनेटमा जमाल मुसियालाले गोल गर्दै टोलीको अग्रता दोब्बर पारे ।
खेलको ४२ औं मिनेटमा लोरी सानेले गोल गर्दै बायर्नलाई पहिलो हाफमा ३-० ले अघि बढाए
।
दोस्रो हाफको ४७ औं मिनेटमा लाजियोका फ्रान्सेस्को एसरबीले आत्मघाती गोल गरेपछि बायर्न ४-० ले अघि बढ्यो। त्यसको २ मिनेटपछि लाजियोका जोआक्विन कोरियाले एक गोल फर्काएका थिए। त्यसपछि बाकी समयमा कुनै गोल हुन सकेन र बायर्नले जित निकालेको हो ।
अब दोस्रो लेग मार्च १७ मा बायर्नको घरेलु मैदानमा हुनेछ ।
