आधारभूमि संवाददाता
काठमाडौँ,माघ २५
स्पेनिस ला लिगा फुटबलमा रियल मड्रिड दोस्रो स्थानमा उक्लिएको छ । शनिबार राति भएको खेलमा रियल मड्रिडले हुयस्कालाई उसकै मैदानमा २-१ गोलले पराजित गरेको हो ।
रियललाई जित दिलाउन राफायल भरानले दुई गोल गरे । हुयस्काको जाभी गलनले एक गोल गरे ।
खेलमा पहिलो अग्रता हुयस्काले लिएको थियो । खेलको ४८ औं मिनेटमा जाभी गलनले गोल गर्दै हुयस्कालाई अग्रता दिलाएका थिए ।तर,खेलको ५४ औं मिनेटमा रियलका राफायल भरानले गोल गर्दै खेल बराबरीमा फर्काए ।
त्यसपछि खेलको ८४ औं मिनेटमा राफायल भरानले व्यक्तिगत दोस्रो गोल गर्दै रियललाई २-१ को जित दिलाए ।
जितसंगै रियलले २१ खेलबाट ४३ अंक जोडेको छ र दोस्रो स्थानमा उक्लिएको छ । शीर्ष स्थानको एट्लेटिको मड्रिडको १९ खेलबाट ५० अंक छ ।पराजित हुयस्काको १६ अंक छ र पुछारमा छ ।
