आधारभूमि संवाददाता
काठमाडौँ, २४ माघ
शनिबार थप ९९ जनामा कोरोना सङ्क्रमण पुष्टि भएको छ ।
स्वास्थ्य तथा जनसङ्ख्या मन्त्रालयको अनुसार पछिल्लो २४ घण्टामा देशभरिका विभिन्न प्रयोगशालामा २ हजार ७ सय ९४ जनाको नमूना परीक्षण गर्दा उक्त सङ्ख्यामा कोरोना सङ्क्रमण पुष्टि भएको हो । यो सँगै हालसम्म सङ्क्रमितको सङ्ख्या दुई लाख ७१ हजार ८ सय ६ पुगेको छ ।
त्यस्तै पछिल्लो २४ घण्टामा पीसीआर विधिबाट २ हजार ७ सय ९४ जनाको परीक्षण भएको छ । क्वारिन्टिनमा रहेका व्यक्तिहरुको सङ्ख्या ९५ रहेको छ । कोरोना सक्रिय संक्रमितको संख्या १ हजार ९ सय ५९ जना छन् । हालसम्म २० लाख ९१ हजार १ सय ६६ जनाको पीसीआर परीक्षण गरिएको छ।
थप २ सय ४८ जना डिस्चार्ज
नेपालमा पछिल्लो २४ घण्टामा २ सय ४८ जनाले कोरोना जितेका छन् ।
योसँगै हालसम्म कोरोनामुक्त भई डिस्चार्ज हुनेको कूल सङ्ख्या दुई लाख ६७ हजार ८ सय १२ पुगेको छ ।
नेपालमा हालसम्म कोरोनाबाट ज्यान गुमाउनेको संख्या दुई हजार ३५ पुगेको छ।
