आधारभूमि संवाददाता
काठमाडौँ,माघ १९
स्पेनिस ला लिगा फुटबलमा शीर्ष स्थानको एट्लेटिकोले १० अंकको अग्रता बनाएको छ । आइतबार राति भएको खेलमा एट्लेटिकोले काडिजलाई उसकै घरेलु मैदानमा ४-२ गोलले पराजित गरेको हो ।
एट्लेटिकोलाई जित दिलाउन लुइस सुआरेजले दुई गोल, सउल निगुएज र कोकेले एक-एक गोल गरे।काडिजको अल्भारो नेग्रेडोले दुई गोल गरेका थिए।
खेलमा पहिलो अग्रता एट्लेटिकोले लिएको थियो । खेलको २८ औं मिनेटमा लुइस सुआरेजले गोल गर्दै एट्लेटिकोलाई अग्रता दिलाएका थिए ।तर,खेलको ३५ औं मिनेटमा काडिजका अल्भारोले गोल गर्दै खेल बराबरीमा फर्काए ।
खेलको ४४ औं मिनेटमा सउल निगुएजले गोल गर्दै टोलीलाई २-१ को अग्रता दिलाए ।
दोस्रो हाफको ५० औं मिनेटमा लुइस सुआरेजले पेनाल्टीमा व्यक्तिगत दोस्रो गोल गर्दै एट्लेटिकोलाई ३-१ ले अघि बढाए।७१ औं मिनेटमा अल्भारोले व्यक्तिगत दोस्रो गोल गर्दै काडिजलाई ३-२ को स्थितिमा ल्याए ।
त्यसपछि खेलको ८८ औं मिनेटमा कोकेले गोल गर्दै एट्लेटिकोलाई ४-२ को जित दिलाए ।
जितसँगै एट्लेटिकोले १९ खेलबाट ५० अंक जोडेको छ र शीर्ष स्थानमा १० अंकको अग्रता बनाएको छ ।दोस्रो स्थानको रियल मड्रिडको १९ खेलबाट ४० अंक छ ।पराजित काडिजको २१ खेलबाट २४ अंक छ १३ औं स्थानमा छ ।
