आधारभूमि संवाददाता
काठमाडौँ,माघ १२
म्यानचेस्टर युनाईटेड एफए कप फुटबलको पाँचौं चरणमा प्रवेश गरेको छ ।आइतबार राति
भएको चौंथो चरणको खेलमा म्यान्चेष्टर युनाईटेडले लिभरपुललाई ३-२ गोलले पराजित गर्दै पाँचौं चरणमा प्रवेश गरेको हो ।
युनाईटेडलाई जित दिलाउन मेसन ग्रीनवुड,मार्कस र्यासफोर्ड र ब्रुनो फर्नांडीसले एक एक गोल गरे । लिभरपुलका मोहम्मद सलाहले दुई गोल फर्काएका थिए ।
खेलमा पहिलो अग्रता लिभरपुलले लिएको थियो । खेलको १८ औं मिनेटमा मोहम्मद सलाहले गोल गर्दै लिभरपुललाई अग्रता दिलाएका थिए ।तर,खेलको २६ औं मिनेटमा युनाईटेडका मेसन ग्रीनवुडले गोल गर्दै खेल बराबरीमा फर्काए ।
खेलको ४८ औं मिनेटमा मार्कस र्यासफोर्डले गोल गर्दै टोलीलाई २-१ को अग्रता दिलाए ।५८ औं मिनेटमा लिभरपुलका मोहम्मद सलाहले व्यक्तिगत दोस्रो गोल गर्दै खेल २-२ को बराबरीमा फर्काए ।
त्यसपछि खेलको ७८ औं मिनेटमा ब्रुनो फर्नांडीसले गोल गर्दै युनाईटेडलाई ३-२ को जित दिलाए ।
जितसंगै युनाईटेड एफए कप फुटबलको पाँचौं चरणमा प्रवेश गरेको छ ।युनाईटेडले अब पाँचौं चरणमा वेस्ट ह्यामसँग प्रतिस्पर्धा गर्नेछ।
