आधारभूमि संवाददाता
काठमाडौं, १० माघ
शनिबार थप २३२ जनामा कोरोना सङ्क्रमण पुष्टि भएको छ ।
स्वास्थ्य तथा जनसङ्ख्या मन्त्रालयको अनुसार पछिल्लो २४ घण्टामा देशभरिका विभिन्न प्रयोगशालामा ३ हजार ५४१ जनाको नमूना परीक्षण गर्दा उक्त सङ्ख्यामा कोरोना सङ्क्रमण पुष्टि भएको हो । यो सँगै हालसम्म सङ्क्रमितको सङ्ख्या २ लाख ६९ हजार १८० पुगेको छ ।
त्यस्तै पछिल्लो २४ घण्टामा पीसीआर विधिबाट ३ हजार ५४१ जनाको परीक्षण भएको छ । क्वारिन्टिनमा रहेका व्यक्तिहरुको सङ्ख्या १४७ रहेको छ । कोरोना सक्रिय संक्रमितको संख्या ३ हजार ४५२ जना छन् । हालसम्म २० लाख ३८ हजार ८४२ जनाको पीसीआर परीक्षण गरिएको छ।
थप ३८६ जना डिस्चार्ज
नेपालमा पछिल्लो २४ घण्टामा ३८६ जनाले कोरोना जितेका छन् ।
योसँगै हालसम्म कोरोनामुक्त भई डिस्चार्ज हुनेको कूल सङ्ख्या २ लाख ६३ हजार ७३४ पुगेको छ ।
नेपालमा हालसम्म कोरोनाबाट ज्यान गुमाउनेको संख्या एक हजार ९९४ पुगेको छ। पछिल्लो २४ घण्टामा थप ८ जनाले ज्यान गुमाएका मन्त्रालयले जनाएको छ ।
