आधारभूमि संवाददाता
काठमाडौँ, १८ मङ्सिर
च्याम्पियन्स लिग फुटबलमा ओलिभियर जिराउड चम्किदा चेल्सीले सेभियालाई पराजित गरेको छ ।बुधबार राति भएको समूह (ई) को खेलमा चेल्सीले सेभियालाई ४–० गोलले पराजित गरेको हो ।
चेल्सीलाई जित दिलाउन ओलिभियर जिराउड एक्लैले चार गोल गरे । जिराउडले एक गोल पहिलो हाफ र तिन गोल दोस्रो हाफमा गरेका हुन् ।
खेलको आठौं मिनेटमा जिराउडले काई हावर्ड्जको पासमा गोल गर्दै चेल्सीलाई सुरुवाती अग्रता दिलाएका थिए ।
दोस्रो हाफको ५४ औं मिनेटमा कोभासिसको पासमा जिराउडले व्यक्तिगत दोस्रो गोल गर्दै चेल्सीको अग्रता दोब्बर पारे।७४ औँ मिनेटमा कान्टेको पासमा जिराउडले व्यक्तिगत तेस्रो गोल गर्दै ह्याट्रिक पुरा गरे ।
त्यसपछि ८३ औँ मिनेटमा जिराउडले व्यक्तिगत चौथो गोल गर्दै चेल्सीलाई ४-० को शानदार जित दिलाए ।
जितसंगै चेल्सीले ५ खेलबाट १३ अंक जोडेको छ र शीर्ष स्थानमा छ।पराजित सेभियाको ५ खेलबाट १० अंक छ र दोस्रो स्थान छ।
