आधारभूमि संवाददाता
काठमाडौँ, १४ मङ्सिर
स्पेनिस ला लिगा फुटबलमा बार्सिलोनाले सानदार जित निकालेको छ।घरेलु मैदान क्याम्प नाउमा आइतबार सम्पन्न भएको खेलमा बार्सिलोनाले ओसासुनालाई ४-० गोलले पराजित गरेको हो ।
बार्सिलोनालाई जित दिलाउन कप्तान लियोनल मेस्सी,मार्टिन ब्रेथवेट,एन्टोइन ग्रिजमान र फिलिप काउन्टीहोले एक-एक गोल गरे । बार्सिलोनाले दुई गोल पहिलो हाफमा र दुई गोल दोस्रो हाफमा गरेको हो ।
खेलको २९ औँ मिनेटमा मार्टिन ब्रेथवेटले गोल गर्दै बार्सिलोनालाई सुरुवाती अग्रता दिलाएका थिए। ४२ औँ मिनेटमा एन्टोइन ग्रिजमानले गोल गर्दै टोलीको अग्रता दोब्बर पारे ।
दोस्रो हाफको ५७ औँ मिनेटमा फिलिप काउन्टीहोले गोल गर्दै टोलीलाई ३-० ले अघि बढाए।त्यसपछि ७३ औँ मिनेटमा कप्तान लियोनल मेस्सीले गोल गर्दै टोलीलाई ४-० को शानदार जित दिलाए ।
गोल गरेपछि मेस्सीले अर्जेन्टाइन लेजेण्ड डिएगो म्यारोडोनाप्रति श्रदान्जली अर्पण गरेका थिए ।मेस्सीले अर्जेन्टाइन क्लब नेवेलको ओल्ड ब्वाईज को जर्सी देखाउँदै म्याराडोनाप्रति गोल समर्पित गरेका थिए ।
जितसंगै बार्सिलोनाले ९ खेलबाट १४ अंक जोडेको छ र सातौं स्थानमा उक्लिएको छ । पराजित ओसासुनाको ११ अंक छ र १५ औं स्थानमा छ ।
