आधारभूमि संवाददाता
काठमाडौँ, २४ कात्तिक
इंग्लिस प्रिमियर लिग फुटबलमा म्यानचेस्टर सिटीसँग साविक विजेता लिभरपुल बराबरीमा रोकिएको छ । आइतबार राति सिटीको मैदान इतिहाद स्टेडियममा भएको खेलमा लिभरपुललाई सिटीले १-१ गोलको बराबरीमा रोकेको हो ।
खेलमा लिभरपुलको लागि मोहमद सलाहले एक गोल गरे भने सिटीको लागि ग्राबियल जिससले एक गोल गरेका थिए।
खेलमा पहिलो अग्रता लिभरपुललेनै लिएको थियो । खेलको १३ औं मिनेटमा मोहमद सलाहले पेनाल्टीमा गोल गर्दै लिभरपुललाई सुरुवाती अग्रता दिलाएका थिए।
सिटीका केली वाल्करले साडियो मानेलाई पेनाल्टी क्षेत्रमा फउल गरेपछि लिभरपुलले पेनाल्टी पाएको थियो ।
खेलको ३१ औं मिनेटमा सिटीका ग्राबियल जिससले केभिन डी ब्रुएनको पासमा गोल गर्दै खेल बराबरीमा फर्काए।पहिलो हाफ बराबरीमा सकियको खेलमा दोस्रो हाफमा कुनै गोल हुन सकेन र खेल बराबरीमा सकियको हो ।
खेलको ४१ औं मिनेटमा सिटीले पेनाल्टी पाएको थियो ।लिभरपुलका जोसेप गोमेजले ह्यान्ड गरेपछि सिटीले पेनाल्टी पाएको थियो ।जसमा केविन डी ब्रुएन गोल गर्न चुके ।
बराबरीसँगै लिभरपुलले ८ खेलबाट १७ अंक जोडेको छ र तेस्रो स्थानमा छ ।म्यानचेस्टर सिटीले ७ खेलबाट १२ अंक जोडेको छ र १० औं स्थानमा रहेको छ ।
शीर्ष स्थानको लीस्टर सिटीको ८ खेलबाट १८ अंक छ।
