आधारभूमि संवाददाता
काठमाडौँ, १७ कात्तिक
रियल सोसिडाड स्पेनिस ला लिगा फुटबलको शीर्ष स्थानमा उक्लिएको छ ।आइतबार भएको खेलमा रियल सोसिडाडले सेल्टा भिगोलाई ४-१ गोल अन्तरले पराजित गर्दै शीर्ष स्थानमा उक्लिएको हो ।
रियल सोसिडाडलाई जित दिलाउन विलियन जोसेले दुई गोल , डेभिड सिल्भा र मिकेल ओयर्जाबालले एक- एक गोल गरे । सेल्टा भिगोको इगो एस्पासले एक गोल फर्काए ।
खेलको २४ औं मिनेटमा डेभिड सिल्भाले गोल गर्दै सोसिडाडलाई अग्रता दिलाएका थिए ।३४ औं मिनेटमा मिकेल ओयर्जाबालले गोल गर्दै टोलीलाई पहिलो हाफमा २-० ले अघि बढाए।
दोस्रो हाफको ५४ औं मिनेटमा विलियन जोसेले गोल गर्दै टोलीलाई ३-० ले अघि बढाए। ७७ औं मिनेटमा सेल्टा भिगोका इगो एस्पासले पेनाल्टीमा एक गोल फर्काए ।त्यसपछि जोसेले खेलको ८१ औं मिनेटमा व्यक्तिगत दोस्रो गोल गर्दै सोसिडाडलाई ४-१ को जित दिलाए ।
खेलको अतिरिक्त समयको इन्जुरी समयमा जोसे फोन्टानले रातो कार्ड खादै मैदान बाहिरिएपछि सेल्टा १० खेलाडीमा सीमित बनेको थियो ।
जितसँगै सोसिडाडले ८ खेलबाट १७ अंक जोडेको छ र शीर्ष स्थानमा उक्लिएको छ। दोस्रो स्थानको रियल मड्रिडको ७ खेलबाट १६ अंक छ। पराजित सेल्टाको ६ अंक छ र १७ औं स्थानमा रहेको छ ।
