आधारभूमि संवाददाता
काठमाडौँ, २ कात्तिक
इटालियन सिरी ए फुटबलमा युभेन्ट्स बराबरीमा रोकिएको छ। शनिबार राति भएको खेलमा १० खेलाडीमा सिमित युभेन्टस नव प्रवेशी क्लब क्रोटोनसँग बराबरीमा रोकिएको हो ।
खेलमा युभेन्टसको लागि अल्भारो मोराटाले एक गोल गरे भने क्रोटोनको लागि सिमोन तोचुकवु न्वान्कवोले एक गोल गरेका थिए।
खेलमा पहिलो अग्रता क्रोटोनले लिएको थियो । खेलको १२ औँ मिनेटमा क्रोटोनका सिमोन तोचुकवु न्वान्कवोले पेनाल्टीमा गोल गर्दै टोलीलाई अग्रता दिलाएका थिए।
२१ औं मिनेटमा युभेन्ट्सका अल्भारो मोराटाले गोल गर्दै खेल बराबरीमा ल्याए । मोराटाले सो गोल डेब्यू खेलाडी फेडेरिको केयसाको पासमा गरेका थिए।
खेलको ६० मिनेटमा डेब्यू खेलाडी फेडेरिको केयसा रातो कार्ड पाउँदै मैदान बाहिरिएपछि युभेन्ट्स १० खेलाडीमा सिमित बनेको थियो ।
बराबरीसँगै युभेन्टसले ४ खेलबाट ८ अंक जोडेको छ । युभेन्टस तालिकाको चौथौ स्थानमा छ। अंक तालिकामा एसी मिलानले ४ खेलबाट १२ अंक जोडेको छ र शीर्ष स्थानमा छ। दोस्रो स्थानको एटलान्टाको ४ खेलबाट ९ अंक छ ।
