पोखरा, ११ असोज /रासस
गण्डकी प्रदेशका मुख्यमन्त्री पृथ्वीसुब्बा गुरुङले फेवातालको सीमाङ्कन र त्यससँग सम्बन्धित समस्यालाई यही आर्थिक वर्षभित्र समाधान गरिने बताउनुभएको छ । विश्व पर्यटन दिवसको अवसरमा ट्रेकिङ्ग एजेन्टस् एशोसियसन अफ नेपाल (टान) पश्चिमाञ्चलले आज आयोजना गरेको ‘फेवा फुट टे«ल ःवस्तुगत अवलोकन’ कार्यक्रममा उहाँले फेवातालको समस्या समाधान नहुँदा फेवातालका अन्य पूर्वाधारका कार्यले शुरु हुन नसकेको बताउनुभयो ।
उहाँले भन्नुभयो, “अहिले राष्ट्रिय मुद्दा बनेको फेवातालको ठोस निर्णयको खाँचो छ, हामीले यसको वस्तुगत अध्ययनसहितको प्रतिवेदन प्रधानमन्त्री समक्ष बुझाएका छौँ, अब यसको छिनोफानो छिट्टै हुन्छ, विकासले गति लिन्छ ।” उहाँले विश्वमा ब्राण्डिङ्ग भएको पर्यटकीय शहर पोखरालाई ‘ग्लोरियस पोखरा’ बनाउन यहाँको प्रकृति र संस्कृतिलाई संरक्षण गर्न आवश्यक भएको बताउनुभयो । मुख्यमन्त्री गुरुङले कोभिड–१९ को मारमा परेका पर्यटन व्यवसायीलाई मौद्रिक नीतिअन्तर्गतको राहत प्याकेज उपलब्ध गराएर लगानीको सुरक्षा गर्न प्रदेश सरकार सकारात्मक रहेको बताउनुभयो ।
प्रदेशका उद्योग पर्यटन वन तथा वातावरण मन्त्री विकास लम्सालले रु छ खर्ब लगानी भएको पर्यटन क्षेत्रलाई अब सुरक्षा सतर्कता अपनाएर चलायमान बनाउनुपर्ने धारणा राख्नुभयो । पोखरा ‘नेचुरल हस्पिटल’ भएकाले यसको प्राकृतिक सुन्दरता र स्वच्छता विश्व बजारमा बेचेर पर्यटनको उत्कृत्ट गन्तब्य बनाउन सकिने उहाँको भनाइ थियो ।
प्रदेशसभा सदस्य राजीव पहारीले फेवाताल वरिपरिको १४ किलोमिटर फुट ट्रेलको लागि प्रदेश सरकारले ७० प्रतिशत लगानी गरे स्थानीय पहलमा ३० प्रतिशतको लगानीको जिम्मा आफूले लिने बताउनुभयो । कोभिड–१९ का कारण यस वर्ष बाह् पर्यटकबिना पर्यटन दिवस मनाउनु परे पनि नयाँ सोच र धारणालाई जीवित राखेर अघि बढ्नु पर्ने उहाँको धारणा थियो ।
पोखरा महानगरपालिका प्रमुख मानबहादुर जिसीले विकासप्रति साझा धारणा आवश्यक रहेको जनाउँदै विकासको शुरुआत भएको बताउनुभयो । उहाँले भन्नुुभयो, “फेवातालको समस्या समाधानको लागि द्रुत गतिमा कार्य अघि बढेको छ, अब ढुक्क हुनुहोस् धेरै दिन कुर्नु पर्दैन ।” टान पश्चिमाञ्चका अध्यक्ष हरि भुजेलले पोखराको गहना फेवातालको बारेमा चासो धेरैले राखे पनि यसको सम्भावनाको विषयमा विस्तृत अध्ययन हुन नसकेको बताउनुभयो ।
संस्थाका उपाध्यक्ष सुशीलराज पौडेलले ग्रामीण पर्यटनलाई जोड दिंदै आएको टानले यस वर्ष कोभिड–१९ का कारण फेवातालको संरक्षण र पूर्वाधारमा जोड दिएर ताल पारि कार्यक्रमको आयोजना गरेको बताउनुभयो । नेपाल पर्यटन बोर्डको समन्वयमा आयोजित कार्यक्रममा पोखराको माछापुच्छ«े प्रतिविम्ब पार्क ड्यामसाइडबाट १० वटा प्याडल डुङ्गामार्फत सामाजिक दूरी कायम गरेर पर्यटन विज्ञ, सरोकारवाला, व्यवसायी, सञ्चाकर्मीसहितको टोली कार्यक्रम स्थल पुगेको संस्थाका सचिव जीवनराज सापकोटाले जानकारी दिनुभयो ।
