आधारभूमि संवाददाता
काठमाडौं ,८असोज
सम्पत्ति विवरण नबुझाएका १९ हजार ६ सय ३१ जना सार्वजनिक पद धारण गरेका व्यक्ति र कर्मचारी कारबाहीमा पर्ने भएका छन् ।
अख्तियार दुरुपयोग अनुसन्धान आयोगले सम्पत्ति विवरण नबुझाउने १७ हजार बढी व्यक्तिलाई कारबाही गर्ने निर्णय गरेको हो ।
बिहीबार बसेको अख्तियारको बैठकले सम्पत्ति विवरण नबुझाउने निजामती कर्मचारी, नेपाल प्रहरीतर्फ शिक्षक लगाएतका कर्मचारीलाई ५ हजार रुपैयाँ जरिवाना गर्ने निर्णय गरेको हो ।
अख्तियार दुरुपयोग अनुसन्धान आयोग ऐन २०४८ को दफा ३१ कको उपदफा ९२० बमोजिम सो निर्णय गरेको प्रवक्ता तारानाथ अधिकारीले वतााएका छन् ।
कारबाहीमा पर्नेमा कारवाहीमा पर्नेमा संघीय तहका निजामती कर्मचारीतर्फ २ हजार ५०४, नेपाल प्रहरीतर्फ १११, शिक्षकतर्फ ७ हजार ६१३, अन्य पदाधिकारी कर्मचारीहरू १ हजार ४३२, प्रदेश तहका ५५४ र स्थानीय तहका ४ हजार ५३४ जना रहेको अख्तियारले जनाएको छ ।
ऐन अनुसार सार्वजनिक पदधारण गरेको व्यक्तिले त्यस्तो पदधारण गरेको मितिले साठी दिनभित्र र त्यसपछि हरेक आर्थिक वर्ष समाप्त भएको मितिले साठी दिनभित्र आफ्नो वा आफ्नो परिवारको नाममा रहेको सम्पत्ति विवरण पेश गर्नु पर्ने हुन्छ ।
साथै बैठकले सतर्कता केन्द्रको अनुगमन प्रतिवेदनमा उल्लेखित विदेशमा रहेका भनी लेखी आएका नेपाली सेनाका ४६० जनाको हकमा भने नियमानुसारको अवधिभित्र सम्पत्ति विवरण भर्ने र भराउने व्यवस्थाका लागि सम्बन्धित निकायमा लेखी पठाउने निर्णय गरेको जनाइएको छ ।
अख्तियारले यसअघि नै सम्पत्ति विवरण नबुझाउनेको जानकारी सम्बन्धित मन्त्रालय, सचिवालय, आयोग र केन्द्रीय निकायमा पठाइसकेको छ ।
अख्तियारका अनुसार प्रदेश तहमा काम गर्ने ५५४ जनालाई पनि कारबाही गर्न सम्बन्धित प्रदेशको मुख्य मन्त्री तथा मन्त्रिपरिषद कार्यालयमा पठाइएको । त्यस्तै स्थानीय तहका ४५ सय ३४ जनाले पनि सम्पत्ति विवरण नबुझाएकाले कारबाही गर्ने अख्तितयारले निर्णय गरेको छ ।
