आधारभूमि संवाददाता
काठमाडौँ, २९ भदौ
काठमाडौंमा थप ५१२ जनामा कोभिड–१९ का सङ्क्रमित थपिएका छन् । स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता प्रा डा जागेश्वर गौतमले पछिल्लो २४ घण्टामा विभिन्न प्रयोगशालामा गरिएको परीक्षणका क्रममा उपत्यकामा ५१२ जनाको पिसिआर पोजेटिभ आएको बताए ।
नयाँ संक्रमितमा काठमाडौंमा ४ सय ४० ,ललितपुरमा २९ र भक्तपुरमा ४३ जना रहेको प्रवक्ता गौतमले जानकारी दिए । यसअघि आइतबार उपत्यकामा ५९७ सङ्क्रमित थपिएका थिए।
नेपालमा सोमबार थप ११७० जनामा कोरोना सङ्क्रमण पुष्टि भएको छ । यो सँगै सङ्क्रमितको सङ्ख्या ५५ हजार ३२९ पुगेको छ । पछिल्लो २४ घण्टामा ८७९ जनाले कोरोना जितेका छन् । योसँगै हालसम्म कोरोनामुक्त भई डिस्चार्ज हुनेको कूल सङ्ख्या ३९ हजार ५७६ पुगेको छ ।हालसम्म आठ लाख ८१ हजार ४०५ जनाको पीसीआर परीक्षण गरिएको छ।
