रसना ढकाल
काठमाण्डौ, १९ भाद्र
कुटपिट तथा जातिय छुवाछुतको घटनाका पीडितहरुलाई उचित क्षतिपूर्ति र पीडकलाई कारबाही गर्ने सम्वन्धमा न्याय तथा अधिकार सस्थाले सप्तरी जिल्ला प्रशासनको ध्यानाकर्षण गराएको छ । उक्त पत्रमा भाद्र १६ गते एक सञ्चारमाध्यममा “कुटपिटबाट घाइते मुसहर दम्पति अस्पतालमा बन्धक” भन्ने शिर्षकमा प्रकाशन भएको समाचार प्रति ध्यानाकर्षण भएको जनाइएको छ ।
सप्तरी, अग्निसाइर कृष्णसावरण गाउँपालिका–६ महुलीका शिवचन्द्र सदा र उनकी पत्नी मलियादेवी सदालाई २०७७ साउन ५ गतेका दिन पानीको निकासका बारेमा विवाद हुँदा स्थानीय दिना साहको परिवारले कुटपिट गरि शसक्त घाईते बनाएका थिए । घाइतेहरुलाई उपचारका लागि गोल्डेन अस्पताल, विराटनगरमा लगिएको र पीडक दिना साहलाई ईलाका प्रहरी कार्यालय कञ्चनपुरले पक्राउ गरेता पनि अनुसन्धान प्रक्रिया अघि नबढाई पीडकलाई साउन ३२ गते नै रिहा गरेको छ ।
अर्को तिर पीडितहरुको उपचारमा लागेको रकम रु. १ लाख ३० हजार पीडकले समयमा नतिरिदिएका कारण पीडितहरु डेढ महिना देखि नै अस्पतालमा थुनिएर बस्नु परेको छ ।
न्याय तथा अधिकार सस्थाले यस घटनामा मुलुकी अपराध संहिता, २०७४ को दफा १९१, १९२ र दफा २०४ का अनुसार पीडकलाई कारवाहीको माग गर्नुका साथै पीडितहरुको उपचारका लागि आवश्यक रकम पीडकबाट भराउनुपर्ने जनाएको छ । उक्त घटनालाइ जातीय छुवाछुत तथा भेदभाव (कसूर र सजाय) ऐन, २०६८ को दफा ४ अनुसार दण्ड सजायका लागि मुद्दा चलाईनु पर्ने माग गरेको छ ।
यस्तो छ ध्यानाकर्षण पत्र