आधारभूमि संवाददाता
काठमाडौं, २९ साउन
पेरिस सेन्ट जर्मन (पीएसजी) २५ वर्षपछि च्याम्पियन्स लिग फुटबलको सेमिफाइनलमा प्रवेश गरेको छ । बुधवार राति भएको खेलमा एटलान्टालाई २-१ ले पराजित गर्दै पीएसजी सेमिफाइनलमा प्रवेश गरेको हो ।
पीएसजीलाई जित दिलाउन मार्क्विन्होस र म्याक्सिम चोउपो मोटिङले एक/एक गोल गरे ।एटलान्टाकालागि मारियो पलासिकले एक गोल गरे । पीएसजीले दुवै गोल दोस्रो हाफमा गरेको हो
खेलमा पहिलो अग्रता एटलान्टालेनै लिएको थियो । खेलको २६ औँ मिनेटमा एटलान्टाका मारियो पलासिकले गोल गर्दै टोलीलाई अग्रता दिलाएका थिए।
दोस्रो हाफको अन्तिम मिनेटमा नेयमारको पासमा मार्किन्होसले गोल गर्दै खेल बराबरीमा ल्याएका थिए । त्यसपछि म्याक्सिम चोउपो मोटिङले इन्जुरी टाइमको तेस्रो मिनेटमा गोल गर्दै पीएसजीलाई जित दिलाए। मोटिङले केलियन एम्बाप्पेको पासमा सो गोल गरेका हुन् ।
फ्रेन्च च्याम्पियन पिएसजीले २५ वर्षपछि च्याम्पियन्स लिगको सेमिफाइनलमा पुगेको हो । यसअघि पिएसजी एक पटकमात्र १९९४-९५ मा सेमिफाइनल पुगेको थियो ।
अब पिएसजीले सेमिफाइनलमा एट्लेटिको मड्रिड र आरबी आईपेजिंगबीचको विजेतासंग प्रतिस्पर्धा गर्नेछ।
