आधारभूमि संवाददाता
काठमाडौँ, २८ साउन
काठमाडौंमा थप १३९ जनामा कोभिड–१९ का सङ्क्रमित थपिएका छन् । स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता प्रा डा जागेश्वर गौतमले पछिल्लो २४ घण्टामा विभिन्न प्रयोगशालामा गरिएको परीक्षणका क्रममा उपत्यकामा १३९ जनाको पिसिआर पोजेटिभ आएको बताए ।
नयाँ संक्रमितमा काठमाडौंका १०९ ,भक्तपुरका ९ र ललितपुरका २१ जना रहेको प्रवक्ता गौतमले जानकारी दिए । मंगलबार काठमाडौं उपत्यकामा एकैपटक १३४ संक्रमित थपिएका थिए ।
त्यस्तै पछिल्लो २४ घण्टामा पीसीआर विधिबाट १० हजार ४ सय ८१ जनाको परीक्षण भएको छ । क्वारिन्टिनमा रहेका व्यक्तिहरुको सङ्ख्या ११ हजार ५८ रहेको छ । कोरोना सक्रिय संक्रमितको संख्या ७ हजार ६१३ छ। पाँच सयभन्दा बढी सङ्क्रमित हुने जिल्लामा पर्सा, रौतहट, महोत्तरी र काठमाडौँ रहेका छन् ।हालसम्म ४ लाख ७२ हजार बढीको पिसिआर परीक्षण भएको छ।
नेपालमा पछिल्लो २४ घण्टामा ६४ जनाले कोरोना जितेका छन् । योसँगै हालसम्म कोरोनामुक्त भई डिस्चार्ज हुनेको कूल सङ्ख्या १६ हजार ७ सय २८ पुगेको छ । त्यस्तै कोरोनाका सङ्क्रमित शून्य रहेका सात जिल्लामा सोलुखुम्बु , सङ्खुवासभा, हुम्ला , मनाङ, मुस्ताङ र डोल्पा रहेका छन् । नेपालमा हालसम्म ९१ जनाले कोरोनाबाट ज्यान गुमाएका छन्।
