आधारभूमि संवाददाता
काठमाडौँ, २६ साउन
नेपालमा कोरोना सङ्क्रमणबाट थप चार जनाको मृत्यु भएको छ । स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले
दुई महिला र दुई पुरुषको कोरोना सङ्क्रमणबाट मृत्यु भएको जानकारी दिए ।
मृत्यु हुनेमा बाँके जिल्ला कोहलपुर नगरपालिका–२ घर भएका ७० वर्षीया महिला रहेकि छिन् । उनको नेपालगञ्ज मेडिकल कलेज कोहलपुरमा उपचारका क्रममा आइतबार मृत्यु भएको हो ।
त्यसतै पर्सा जिल्ला देवयानी गाउँपालिका १५ बस्ने ४५ वर्षीय महिलाको पनि कोभिड सङ्क्रमणका कारण मृत्यु भएको छ । उनको हिजो नारायणी अस्थायी कोभिड अस्पतालमा मृत्यु भएको हो ।
यसैगरी काठमाडौँ महानगरपालिका–१० मध्यबानेश्वर बस्ने ७६ वर्षीय पुरुषको आज मेडिकेयर अस्पतालमा र कीर्तिपुर नगरपालिका ट्याङ्लाफाँट बस्ने ६४ वर्षीय पुरुषको पनि कोरोना भाइरसका कारण मृत्यु भएको मन्त्रालयले जनाएको छ । यससँगै नेपालमा कोरोना भाइरसका कारण मृत्यु हुनेको सङ्ख्या ७९ पुगेको छ ।
