काठमाडौं, साउन १९
पर्सा जिल्लाको बीरगंज महानगरपालिका २६ स्थित तिलाबे खोलाले बगाई बेपत्ता भएकी एक बालिकाको शव साउन १९ गते एपीएफ टोलीले फेला पारेको छ ।
सोही ठाउँ बस्ने १४ वर्षिया आँचलकुमारी उपाध्याय उक्त खोलामा नुहाउने क्रममा डुबेर बेपत्ता भएकी थिईन । सो घटनाबारे जानकारी पाउनासाथै सशस्त्र प्रहरी बल, नेपाल नम्बर १३ गण पर्सा र सुरक्षा वेश गौरभाटाबाट खटिएको एपीएफ टोली उनको खोजी कार्यमा जुटेको थियो । एपीएफ टोलीले उनको शव उक्त खोलामा डुवेको अवस्थामा फेला पारेको हो ।
यसैगरी डोटी जिल्लाको शिखर नगरपालिका १० गहनान स्थित सेती नदिमा बेपत्ता भएका दुई जनाको शव एपीएफ टोलीले फेला पारेको छ । डडेल्धुरा जिल्लाको पर्शुराम गाउँपालिका बस्ने २१ वर्षिय हरिश जोशी र बझाङ्ग जिल्लाको खप्तड छात्रा गाउँपालिका बस्ने २० वर्षिय दिनेश सिंह सो नदिमा नुहाउने क्रममा उक्त नदिले बगाई बेपत्ता भएका थिए ।
सो घटनाबारे जानकारी पाउनासाथै सशस्त्र प्रहरी बल, नेपाल नम्बर २६ गणबाट खटिएको गोताखोरसहितको एपीएफ टोलीले हरिश जोशीको शव साउन १८ गते र दिनेश सिंहको शव साउन १९ गते फेला पारेको हो । एपीएफ टोलीले उनीहरुको शव सो ठाउँ नजिकै फेला पारेको हो ।