आधारभूमि संवाददाता
काठमाडौं ,साउन १२
सरकारले पर्साको ‘अयोध्यापुरी’ मा पुरातात्विक तथ्य पत्ता लगाउन उत्खननमा चासो दिएसंगै पुरातत्व विभागले अनुसन्धान अघि बढाएको छ ।
अयोध्यापुरीको विषयमा जानकारी लिन आउनेहरूलाई सही सूचना दिनको लागि तथा खोज, उत्खनन् र अनुसन्धानमा सघाउनको लागि तत्कालीन गाविस अध्यक्ष नारदमणि पौडेलको अध्यक्षतामा समिति गठन भएको छ ।
प्रधानमन्त्री केपी शर्मा अेलीले अयोध्यापुरी नै सक्कली ‘अयोध्या’ भएको दावी गरेपछि पुरातत्व विभागले चासो दिंदै अनुसन्धानका प्रकृया अघि बढाएको थियो ।
त्यस्तै माडी नगरपालिकाको वडा नं ८ मा पर्ने आयोध्यापुरी क्षेत्रमा हेर्नको लागि जिल्लाबाहिरबाट पनि आउन थालेका छन् ।
विभागले अयोध्यापुरीको उत्खनन अघि बढाउन थप बजेटको प्रतिक्षा गर्दै अन्य प्रकृयाको तयारीमा रहेको जनाएको छ ।
अहिले बाहिर आएका प्रमाणहरु आप्रामणिक रहेकोले अयोध्यापुरीमा उत्खनन गरेपछि मात्रै भगवान रामको ‘जन्मभूमि’ थियो वा थिएन भन्ने स्पष्ट हुने विभागका अधिकारीहरुले वताएका छन् ।
विभागका अनुसार सरकारले पर्साको ठोरीस्थित ‘अयोध्यापुरी’ मा भगवान रामसँग जोडिएका पुरातात्विक तथ्य खोजीका लागि उत्खनन गर्न विज्ञहरुसँग छलफल अगाडि बढाएको छ।
इतिहासविद्, संस्कृतिविद् र धर्मविदसँग छलफल अगाडि बढाइएको छ। प्रारम्भिक चरणमा उत्खननको लागि विज्ञहरुसँग छलफलको प्रक्रिया अगाडि बढाइएको जानाइएको छ ।
पर्सा र चितवनको ठोरीनजिकै रामको जन्म भएको भनिए पनि चितवनको माडी नगरपालिका क्षेत्रमा नै सयौँ वर्ष पुराना इटाका टुक्रा, ढुङ्गा, माटो लगायत केही भौतिक सामग्री रहेकाले यहीँ हुनसक्ने यहाँका स्थानीयको अनुमान छ ।
अनुसन्धान पछि वडा नं १ वाल्मिकी क्षेत्रमा लवकुशको घोडा बाँध्ने स्थान, लवकुश खेल्ने स्थान, कुवा, सीता पाताल भासिएको स्थान त्यहाँ भेटिएको प्रमाणहरू र धार्मिक ग्रन्थमा उल्लेख भएका विषय मिल्ने गरेको नगरपालिकाले जनाएको छ ।
हाल अयोध्यापुरी क्षेत्रमा वाल्मीकि आमश्र छ । तर यो क्षेत्रको पुरातात्विक महत्वबारे अहिलेसम्म खोज अनुसन्धान भएको छैन ।
प्रधानमन्त्री केपी शर्मा ओलीले भगवान राम नेपालमा नै जन्मेका र अयोध्या पनि नेपालमै पर्ने बताए पछि धार्मिक र सांस्कृतिक क्षेत्रमा बहस शुरु भएको हो ।