इलाम, ३ साउन /रासस
पूर्वप्रधानमन्त्री झलनाथ खनालको शब्द रहेको गीतको म्युजिक भिडियो सार्वजनिक भएको छ ।
इलामको सेरोफेरोलाई समेटेर पूर्वप्रधानमन्त्री खनालले रचना गर्नुभएको ‘इलाम हाम्रो चियाबारी राम्रो’ बोलको गीतको म्युजिक भिडियो सार्वजनिक भएको हो ।
इलामका बिभिन्न पर्यटकीय र प्राकृतिक ठाउँको वर्णन गरिएको सो गीतमा चर्चित गायक यम बरालको स्वर रहेको छ । मिलन तिमल्सिनाको सङ्गीत रहेको उक्त गीतको एरेन्ज दिनेश राजवाहकले गर्नुभएको छ । द पेक डिजिटल रेकर्डिङ स्टुडियोमा रेकर्ड भएको उक्त गीत डाइनामिक मल्टीमिडियाको व्यानरमा निर्माण गरिएको छ ।
गीतको निर्देशन राज केसीले गर्नुभएको छ । इलामको सन्दकपुर, माईपोखरी, कन्याम, अन्तु, इलाम चिया बगानजस्ता क्षेत्र समेटिएको गीतको भिडियोमा कृष्ण भट्टराई, प्रमोद रावल, अविषेक गुरुङ, कपिल बुढाथोकी, सन्तोष लोहार, मुकेश घतानी, पूर्णिमा थामी र आरोही श्रेष्ठले अभिनय गरेका छन् । नरेश ऐरको छायाङ्कनमा निर्माण गरिएको गीतको सम्पादन प्रकाश एसकेले गर्नुभएको छ ।
