आधारभूमि संवाददाता
काठमाडौ, असार १८
पछिल्लो २४ घण्टामा थप ४७३ जनामा कोभिड–१९ का सङ्क्रमित थपिएका छन् । स्वास्थ्य मन्त्रालयका प्रवक्ता प्रा डा जागेश्वर गौतमले देशभरिका विभिन्न प्रयोगशालामा गरिएको परीक्षणका क्रममा आज जम्मा ४७३ जनाको पिसिआर पोजेटिभ आएको र त्यसमध्ये १०९ महिला र ३६४ पुरुष रहेको जानकारी दिए ।
योसँगै हालसम्म १४ हजार ५१९ जनाको पिसिआर पोजेटिभ आएको छ ।
थप ६६४ जना डिस्चार्ज
नेपालमा पछिल्लो २४ घण्टामा ६६४ जनाले कोरोना जितेका छन् । स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले पछिल्लो २४ घण्टामा ६६४ जना डिस्चार्ज भएको बताए ।
योसँगै हालसम्म कोरोनामुक्त भई डिस्चार्ज हुनेको कूल सङ्ख्या ५ हजार ३२० पुगेको छ । हालसम्म कोरोनाबाट मृत्यु हुनेको संख्या ३१ पुगेको छ।
