काठमाडौं, असार ११
संरक्षित वन्यजन्तुको आखेटोपहार ओसार पसार मुद्दाका फरार प्रतिवादीकाठमाडौं महानगरपालिका-६ बौद्धबस्ने हुम्लानाम्खा गाउँपालिका ६ घर ठेगाना भएका ५० वर्षीय कुन्जोक लामा भन्ने कुन्जोक छिरिङ तामाङलाई बिहीबार प्रहरीले पक्राउ गरेको छ ।
केन्द्रीय अनुसन्धान ब्यूरो महाराजगंजबाट खटिएको प्रहरीले काठमाडौं महानगरपालिका-६ सिमलटारबाट फेला पारी उनलाई पक्राउ गरेको हो । २०६२ भदौ १६ गते रसुवा साविक स्याफ्रु गाविस-९ मा पाटे बाघको छाला ५ थान, चितुवाको छाला ३६ थान, ओतको छाला२ सय ३८ थान र बाघको हड्डी १ सय १३ के.जी. आखेटोपहार सहित पाँच जना मानिसहरु पक्राउ परि दोषी ठहर भई कैद भुक्तान समेत गरी सकेको उक्त मुद्दामा संलग्न मुख्य अभियुक्त तामाङ वारदात मितिदेखि नै फरार रहेका थिए ।
तामाङलाई आवश्यक कारवाहीको लागि लामटाङ राष्ट्रिय निकुञ्ज कार्यालय धुन्चे रसुवामा बुझाइएको केन्द्रीय अनुसन्धान ब्यूरोले जनाएको छ । साथै तामाङ वन्यजन्तु सम्बन्धि बिभिन्न अपराधमा संलग्न रही सोही ब्यूरो र ईन्टरपोलको समेत सर्वाधिक खोजी सूचीमा रहेको उक्त ब्यूरोले जानकारी दिएको छ ।
