आधारभूमि संवाददाता
काठमाडौ, असार ९
पछिल्लो २४ घण्टामा थप ५३८ जनामा कोरोना भाइरसको संक्रमण पुष्टि भएको छ । स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले विभिन्न प्रयोगशालमा गरिएको परीक्षणमा ५३८ जनामा सङ्क्रमण देखिएको बताए । तीमध्ये ४४८ जना पुरुष र ९० जना महिला रहेका छन् ।
योसँगै संक्रमितको कूल संख्या १० हजार ९९ पुगेको छ भने सङ्क्रमणबाट निको भइ २२२४ जना घर फर्किसकेका छन् । पछिल्लो २४ घण्टामा ६८ जना पुरुष र ८ जना महिला गरि ७६ जना कोरोनामुक्त भएका छन् । प्रवक्ताका अनुसार नेपालको रसुवा बाहेक सबै जिल्लामा कोरोना संक्रमित भेटिएका छन् भने नेपालमा हालसम्म २४ जनाले ज्यान गुमाएका छन्।
