आधारभूमि संवाददाता
ललितपुर, २६ जेठ
कोरोनाका कारण देशभर भइरहेको लकडाउनले गर्दा अहिले सबै ब्यापार, विकास निर्माणका काम ठप्प छन् । कोरोनाका कारण मानिसहरु घर भित्र बस्न बाध्य छन् । तर महालक्ष्मी नगरपालिकाले लकडाउनमा पनि विकास निर्माणको काम अघि सारेको छ । नगरपालिकाले उदयविनायक वडा भवन जाने बाटो र गोदावरी खोला जोड्ने बाटोको स्तरोन्नती कार्य अघि बढाएको हो । यी दुवै योजना २०७७ जेठ ५ गतेबाट सुरु भएर २०७८ असार ५ गते सम्पन्न हुने उपभोक्ता समितिले जनाएको छ ।
वडा भवन जाने बाटोको कुल लागत १२ लाख रुपैयाँ रहेको छ । जसमध्ये नगरपालिकाबाट १० लाख रुपैयाँ र उपभोक्ता समितिबाट २ लाख रुपैयाँ बिनियोजन गरिएको छ । त्यस्तै गोदावरी खोला जोड्ने बाटोको कुल लागत ६ लाख रुपैयाँ रहेको छ । यसमा भने नगरपालिकाबाट ५ लाख रुपैयाँ र उपभोक्ता समितिबाट १ लाख रुपैयाँ बिनियोजन गरिएको छ ।
