काठमाडौँ, २९ फागुन
फ्रेन्च क्लब पेरिस सेन्ट जर्मेन(पिएसजी) च्याम्पियन्स लिगको क्वाटरफाइनलमा प्रवेश गरेको छ।
बुधबार राति भएको अन्तिम १६ को दोस्रो लेगमा बोरुसिया डर्टमण्डलाई २-० गोल अन्तरले पराजित गर्दै समग्रमा ३-२ को जितसहित पीएसजी अन्तिम आठमा प्रवेश गरेको हो।
घरेलु मैदान पार्क डे प्रिन्समा भएको खेलमा पीएसजीलाई जित दिलाउन नेयमार र जुवान बर्नाटले एक एक गोल गरे ।
खेलको २८ औं मिनेटमा नेयमार गोल गर्दै पीएसजीलाई शुरुवाती अग्रता दिलाएका थिए । खेलको ४५ औं मिनेटमा बर्नाटले गोल गर्दै पीएसजीलाई २-० को अग्रता दिलाए । त्यसपछि दोश्रो हाफमा कुनै गोल हुनसकेन र पिएसजी क्वाटरफाइनलमा प्रवेश गरेको हो । पीएसजी छैटौं पटक च्याम्पियन्स लिगको क्वाटरफाइनल पुगेको हो ।
पहिलो लेगमा पिएसजी २-१ ले पराजित भएको थियो।
डर्टमण्डका एम्रे चानले ८९औं मिनेटमा रातो कार्ड खाँदै मैदान छाडेका थिए र १० खेलाडीमा समेटिएको थियो ।
